ابي رأيكم بكوفي شوب استأجر اولا

شموخ السلطان · #1 (**permalink**) 24-06-2011, 01:58 PM

ابي مشورتكم بأول شي احاول اشتغل فيه

قريت اعلان ان في مشغل يبي يأجر صاله مزوده بكفي شوب وفيه 25 كرسي
وبكلمل معداته

الفكره حطيتها برأسي وقلت منها اسلس وقتي ومنها اكسب

سؤالي لكم يأخوان

هل يكون في الكفي مكسب على الاقل يغطي تكاليف الاجار
وهل اقدر اوسع الشغل غير الكفي

بمعنى اخر وش اقدر ابيع فيه وياليت من عنده فكره او شاف تجربة احد هل نجح او لا

وجزاكم الله كل خير

فتىآ الشرقيه · #2 (**permalink**) 24-06-2011, 02:13 PM

السلام عليكم ورحمة الله وبركآته

اول شي خيتي تآكدي كم الايجار

وهل تم تشغيل الكوفي شوب من قبل او لا

واذا نعم كيف كآن دخله

والايجار الدفع مقدم الى كم شهر وعشآن لاتصير المغامره كبيره اتفقي معآهم ادفعي مقدم 3 ـآشهر وحتى لو حصلت خساره لا سمع الله تكون ضعيفه وتستفيدي منهآ كتجربه لك في حيآتك 3 اشهر

كنصيحه فقط لا غير ...

وبخصوص ايش ممكن تضيفي مع الكوفي

1 . مآكينة فشآر

2 . مآكينة سلاش 2 حوض

3 ـآكوآز الذره

4 . بطآطس شبس وليز وشكلآتآ بآنوآعهآ

5 . مويه وعصير سن توب . لا يكثر > لاتنسي عندك مآكينة سلاش مثلجآت عشآن تمشي بعد والكآس الصغير ب 2 ريال

وقبل هذا كله تآكدي من عدد الزباين على هذا المشغل وارتيآد النآس عليه وسمعته وموقعه
( اذا كآن ارتيآد النساء عليه ضعيف فمغامره الدخول فيه )

ودمتم بود ..

sult@no · #3 (**permalink**) 24-06-2011, 02:22 PM

موفق بإذن الله ... لك مني أجمل تحية .

مجتهداول · #4 (**permalink**) 24-06-2011, 02:38 PM

اظيف لكلام فتىا لشرقية اذا كان دخل مشغل هل المشغل نفسه شغل واقسامه له زبائن اسالي عن حجم الزبائن وعن نوعيتهم هل زبائن يحبون الفخفه والحركة فيه كبيره والا لانه زبائن المشغل بالعاده راح يكوني زباينك وراح يحيبون لكي الزبائن

حلم حياتي اتوظف · #5 (**permalink**) 24-06-2011, 03:05 PM

بالاضافة ما تفضلو به الاخوان لازم تروحي بنفسك للمشغل وتقيمي بنفسك نوعية الزباين وتسئلي الرسبشن عن اوقات الزحمه متى وتعالي في وقت الزحمه وقيمي عدد المتواجدات ..

وبعدين روحي لأشهر الكوفي شوبات النسائية في مدينتك وخذي معاكي دفتر سجلي فيه وش يقدمون + طريقة تعاملهم مع الزبائن وزوري اكثر من فرع راح تكوني فكرة رئيسية عن الكوفي شوب وتبنين عليها ادارتك للكوفي ..

حاولي ان يكون الكوفي مرتبط بالمشغل اكثر بمعنى تطبعي على كاسات + مناديل الكوفي شعار المشغل في البداية حتى تكسبي على اقل تقدير زبونات المشغل نفسه وتقدري تحطي لهم انترنت كمان كخدمة مجانية عشان يجو ويجلسو بالكوفي ينتظرو مثلا دورهم في المشغل بدل ما يجلسو بالمشغل وحطي لهم تلفزيون متوسط الحجم للي تحب تتفرج وقت انتظارها وكل شوي ترسلي العاملات لهم يسألونهم وش تحب تشرب او تاكل كيك دونات شوكلاته

شموخ السلطان · #6 (**permalink**) 24-06-2011, 06:45 PM

الله ينور على كل من رد على موضوعي ويرزقه من حيث لايحتسب

شموخ السلطان · #7 (**permalink**) 24-06-2011, 07:23 PM

من جد محتاره وابي مشورتكم
صاحبة المشغل تبي تأجره سنه وكل سنه تجدد اذا بغيت

وتأجيره بالسنه 30000 ثلاثون الف

ورافضه تأجيره 6 شهور فقط للتجربه

شورو علي