موفق بإذن الله ... لك مني أجمل تحية .

حياك الله اخي
فعلا السوق فيه ربح لكن اختلف معاك انه يكون خبير....... انا بدأت في السيارات وماعندي اي خبره لكني كنت مفتح وعرفت نظام السوق فقط....... وماجلست تقريبا 4 شهور الا صرت فاهم الطبخه
السوق درجات فيه مبتدأ وفيه خبيره وفي محترف وفي شخص عنده ذمه وفي شخص طماع

حنا راح نعطيكم الأساسيات الأولى عشان تصير مبتدأ وانت مع الوقت راح تصير خبير..... والي قصدته انا ان السوق لا يقتصر فقط على الخبراء مثله مثل اي مجال آخر

شكرا اخي سررت بتواجدك معنا

اتمنى لك التوفيق والنجاح ومثل ما ذكرت سالفا ان هذا السوق لا يحتاج إلى رأس مال كبير
بقدر ما يتحاج الى صبر وتأني ويمكن تبدأ حتى بـ 3000 الآف اذا انك فهمت الشغله
تابع معنا وراح تستفيد اكثر

وحنا هدفنا من هالموضوع انا نخرج اكبر عدد من الشباب يكون عندهم ذمه ويخاف ربه
والإصلاح مطلوب في جميع المجالات ...... وللأسف سوق السيارات صار حكر على مجموعه معينه
وعلى قولهم الطيور على اشكالها تقع......... وللأسف يجي واحد او اثنين ويخربون على الباقي وهذا الشي
للأسف يعطينا فكره خاطئه خصوصنا حنا يالعرب لأنا دائما نبي على الإنطباع الأولى وحتى انت مثلا لو يصير بينك وبين شخص موقف وجيت تتكلم عنه تذكر قبيلته ولا تذكر اسمه وهالشي الي صاير بالضبط مع شريطية السيارات لو يغشك واحد منهم على طول تروح تقول والله شريطي غشني حتى ساد المفهوم ان الشريطي هذا انسان مايخاف ربه وغشاش مع ان الغش حاصل في كل تجاره ويمكن في السيارات بشكل اكبر وذلك بسبب جهل الناس الي بالسوق بعضهم حتى ما معه الإبتدائيه ولا يعرف شي او تحصله يماني جاي تهريب ولا يعرف شي في الدين ........ لكن نطمح ان شاء الله ان يكون من بيننا شباب يمتهنون هذا الشي ويطبقونه على اصوله ................. تحياتي

الله يجزاك خير ومشكور على الدعوه

رأس المال تكلمت عنه سابقا وقلت لا يحتاج الى رأس مال كبير ممكن تبدأ بـ 3000 الآف وومكن تبدأ بـ 50 ألف والأفضل من 15 الف ألين 25 الف كبدايه
وبالنسبه للأنواع الي عليها طلب تختلف من منطقه إلى منطقه وتكاد تشترك في انواع معينه مثل الكامري والهايلكس....... وفعلا كلامك صحيح في ناس تشتري من مدينه وتبيع في مدينه أخرى مثل الكابرس مثلا يشترونه من الرياض ويبيعونه في الطايف والهايلكس يباع في القصيم وهكذا
وانا راح اتطرق لها النقطه في المحاضره الجايه وراح تستفيد اكثر ولا تستجل وبالتوفيق

حياك الله اخوي وسررت بلقائك
اغلب الأسئله الي سألتها انا راح اجيبها في باقي الدرس بس انت استعجلت شوي وراح اجاوب بس ضروري تتابع باقي الدرس على شان تستفيد اكثر

1- اخي بالبدايه تركيزك يكون على نوع واحد من السيارات بمختلف موديلاته من اقدم موديل الى احدث موديل الي يناسب رأس مالك..... مثلا رأس مالك 15000 ريال تبدأ في الكابرس من موديل 90 إلى موديل 2002
وهذا النوع من السيارات مرغوب في المنطقه يعني على حسب منطقتك تشوف النوع الي ماشي وهالشي راح اتكلم عنه ......... هذا كبدايه فقط وبعدها تنتقل إلى نوع اخر وهكذا حتى تنتقل إلى القسم الثاني من المتاجره بالسيارات وهو إعادة تجديد السياراه وهذا فيه ارباح خياليه اكثر من الأول ولا تستعجل اخوي اكل العنب حبه حبه

2- بالنسبه للأسعار قلت ان السوق هو الي حدد وانا راح اعطيك طريقه تصير تعرف فيها الأسعار بإذن الله

3-الشراء من تحت المكرفون مخاطره كبيره ولا ينصح بها كمبتدأ لان في الغالب مايباع تحت المكرفون يكون فيه عيوب كثيره وصاحبها لا يرغب في ان الشخص الذي يريد ان يشتري يفحصها ولذلك يجيب ان يكون عندك الخبره الكافيه في السيارات وفي الأشخاص ايضا من طريقة لبسه ومن كلامه تميز اذا هو كاذب او صادق او انسان مستهتر وهذي المرحله الأخيره من مراحل تجارة السيارات

4- نعم فيها اجراءات نقل ملكيه وفيها تأمين بس اهم شي تكون مفحوصه واستمارتها مجدده او يتحملها البائع........ وترا ما تكلف شي يعني اذا انت بتكسب في السياره 4000 ريال ما تستاهل اجراءات نقل ملكيه ؟

5- طبعا هالشي حاصل كثير بس ما انصح فيها كمبتدأ انصحك انك تنزل لسوق وشوي شوي الين ما تتمكن منه... ومع الوقت والخبره راح تتعلم

اتمنى اني اكون افدتك يالغالي

مشكور على النصائح اخي
وشي طبيعي انك ماتشتري من شريطي لان الشريطي يبي يتكسب ولكن انت راح تشتري تبعا لأسعار السوق الي انت عارفها وتبعا لنظافة السياره اذا فهمت هذي النقطتين مافي ابن امه يقدر يضحك عليك
وبالنسبه لإجراءات نقل السياره والأوراق اصلن المعارض ما يعطونه باقي فلوسه لين تنقل السياره بأسمك يعني مامنها خوف حتى لو ماجاب باقي الأوراق ماراح يتسلم سياراته واصلن المعرض مستحيل يكتب المكاتبه بينكم الا بإستمارة السياره وبطاقات الهويه اما بالنسبه للفحص والتأمين حتى لو ماجابها امرها سهله تقدر تطلعها اهم شي استمارة السياره

بالنسبه لسيارات تحت المكرفون هي دائما للأشخاص الي يرغب في البيع بسرعه ودائما يحدث فيه بيع النجش اي انهم يزايدون في السعر عشان تطلع لهم نسبه اكبر عند البيع لكن انت مع الوقت راح تصير تعرف الأشخاص لانو دائما يغير لبسه مره تحصله لابس شماغ مره بدون مره لابس لبس رياضي
اهم مافي الموضوع الصبر ثم الصبر وخليك في السوق شهر او شهرين لمدة ساعتين يوميا ماراح يضرك هالشي بالعكس حتى الناس اذا عرفوك انك تنزل المعارض وتخاف ربك يصيرو يوصونك على سيارات ويعطونك سياراتهم تبيعها لهم وبتعين خير ومن يتق الله يجعل له مخرجا

طبعا مشروع ناجح اذا توفرت فيه الأسس الصحيحه والصبر والعلم الكافي
وطبعا ضروري تحط مبلغ على جنب عشان اذا طلبت السياره منك شي يكون عندك
مبلغ متوفر

تحياتي وسررت بتواجدك