السلام عليكم ورحمة الله وبركاته :
اخواني عندي راس مال وودي اشتغل في المعدات الثقيلة ومحتار بين شيول كتربلر 950f او قلاب *** بوز موديل 85 وابغى شوركم انا ابشتري واجر على الشركات على طول وشكرا.

للرفع

[align=center]
اخووي ابعد عن المعدات الثقيله دام عندك رأس مال

المعدات الثقيله مايدخلها الا شخص عنده مبلغ احتياطي غير رأس المال .. لا يجيك احد يقول لك ادخل خذ العلم واحفظه ..

انت شخص عندك رأس مال وتبي دخل شهري صح ؟؟ المعدات طال عمرك لو تشتري لك مثلاً شيول وتأجره لشركه ترى الشركه مو كل شهر بتعطيك فلووس خذها قاعده يمكن تسحب عليك شهر شهرين يمكن 4 شهوور ويمكن اكثر وبعدها تجيك الدفعه كامله عن الشهور اللي راحت على كذا انت ما استفدت .. وترى المعدات يبي لها شخص فاضي واعصابه هادئه جداً جداً .. الوقت الحالي دور لك مشروع يدخل عليك مبلغ شهري واذا كنت مو محتاج شهرياً فكر بعد سنه سنتين انك تجيب رأس المال .. ولابد لك علاقات مع اصحاب المعدات الثقيله عشان اذا واجهت مشكله يحلونها لك ويفهمونك الطريقه الصحيحه .. الكلام كثيير وانا والله ما ابي اكسر مجاديفك ولكن شف لك مشروع ثاني طقطق فيه وبعدها ادخل مشروع المعدات الدعوه نسبه وتناسب وشكراً لك .
[/align]

[align=center]
اخوي اذا رأس مالك فوق الـ 300 ألف أنصحك انك تشتري غنم ( نعيمي )

قالوها زمان الناس ( الغنم غنيمه ) ويقولون راعي الغنم دايم مخباه مليان .. لأنه اذا بغى فلوس مايروح لفلان وعلان على طول يروح للغنم وياخذ على حسب رغبته بالمبلغ الف الفين ثلاثه ويبيع ويحط الفلوس في مخباه ويقضي لزوومه .. ويكفيك اذا جاك ضييف اذبح له ويكفيك انك تذبح من الغنم وتحط في ثلاجتك ويكفيك انك اذا طفشت من المدينه تروح للبر عند غنمك وانبسط عندها ويكفيك ان الغنم ( النعيم ) تولد بالسنه مرتين يعني كل 6 شهور تجيب لك ( طلي ) أقل شي تبيعه فوق الـ 700 ريال وامه تبيعها على 1800 1900 وتوصل 2000 وشوي ..

بس ترى يبي لها شغل وشخص متفرغ لها .. والشخص اذا مو فاضي للغنم سلمها لأخوك اذا كان عاطل ماعنده وظيفه او يطلع من وظيفته اذا راتبها مايكفي له عادي جداً وكل تعبه وجهده له راتب يمشي له وعطه نسبه بعد ..

بعطيك مثال نفرض انك شريت غنم عددها 350 نعيم

ونفرض ان اللي جابت عيال عددهاا 150

يعني 150 اضربها في 2 لانها تولد في السنه 2

150 × 2 = 300 طلي

وتخليه شهرين 3 شهور وتبيعه بمبلغ 700 ريال هذا اقل شي

300 × 700 = 210 آلاف ريال ينطح ريال

ترى انا حسبت اقل سعر يعني فيه مواسم ماحسبتها بسعرها عيد الاضحى او عيد الفطر

يعني سنوياً اقل شي في جيبك 210 آلاف ريال هذا اذا بغيت تبيع كل المواليد يعني رجعت رأس مالك يمكن في سنه و6 شهوور ..

والله ياعزيزي اعرف لك ناس بنو عماير من الغنم وشروا احلى السيارات من الغنم بس هم ماسكين غنمهم ويسنعونها صح .. عسى الله يوفق الجميع
[/align]

اشتر لك راس تريله من نوع مان وسطحه وقدم على سواق هندي
وراح تلاقي قدامك انواع الردود اليومية .. مثل من الرياض الى مكة او من جدة الى المدينة او من جده للرياض
يعني تاخذ شحنه اسمنت من القصيم وتوديها لجدة وتاخذ من جدة شحنة شعير وترجعها للقصيم
الرد مايقل عن 800 .. التريله والسواق كلهم بيدك وفلوسك تاخذها قبل ماتمشي
بس يبغالك احد يرشدك للطريق عشان تسلكه وتمشي امورك

او اصنع لك صندوق قلابي واشتر لك راس وقدم على فيزا سواق هندي واجره على الشركات
يعطونك مع السواق اقل شي 18 الف تزيد او تنقص شي بسيط


بخصوص المعدات انت مايبغالك تجي هنا ابد ..

لازم تقابل ناس عندها نقليات وعارفه السوق كويس وتثق فيهم .. واسدح قدامه راس مالك .. قله دبر لي

راح يعطونك عصاره خبرتهم ويدلونك الطريق الصحيح


وبالتوفيق

هلا اخوى انا عندى خلفيه في المعدات اذا انت موظف راح تتعب فيها انا عندى راس مال والان ببدا في مشروع بحول الله بمقدورى اخذ معده بس ترى مو سهله الشغله ولا تاخذ حقك حتى شركة بن لادن تاخيراتها في المستحقات تتاخر كثير اذا بتاخذ جديد صحاسهل عليك بس مستعمل والله انا مجرب اتعبتنى فتره انصحك تغير الفكره وتشوف مشروع وتسوي له دراسه جدوى لا ترمى فلوسك كذا اهم شي الدراسه قبل التنفيذ تحياتى لك موفق ان شاء الله

اخوي تبي تغتني وتبي تلعب بالفلوس
تبي تعيش بعز وتسكن بيت ملك
تبي تسدد كل ديونك

توكل على الله وادخل بسوق الغنم
والله لتعين خير

لكن الغنم يبي لها اول شي مزرعه
ويبي لها اقل شي عاملين

تستاجر لك مزرعه فيها ماء واذا تملك ارض شي طيب
وتزرعها برسيم وتحط حلالك فيها
وعاملين يزرعونها و يرعون الغنم كل واحد راتبه 1000 بالكثير

لو اخذتهم الان بأذن الله وعرفت تضبطهم وتنسق امورك ما يجي عيد الفطر
الا وانت مرجع راس مالك وزياده

والله اعرف واحد باني شاري عماره بـ700 الف وكاش من الغنم
واعرف واحد عريف في امن الطرق بايع على اخوياه دين غنم ما يقل سعرها عن 800 الف
ومو اقساط البيعه لا على دفعتين كل 6 شهور
سددوه والحين اخوياه كلهم معينين خير من الغنم طلعو راس مالهم خلال فتره قصيره

طبعاً المشروع ربحه خيالي لكن يحتاج تفهمه تدرسه وتهتم فيه
لانه يحتاج اهتمام ورعايه وتطعيمات

واااهم شي يكون عندك مزرعه عشان الربح يكون دبل وماهي ظروريه لكن عشان تكتفي
وما يحتاج تشتري اعلاف فقط يكون عليك تشتري الشعير

والله يوفقك يارب