أخت بيوكيميست الله يسهلها عليك حاولي تتصلين بمديرة التدريب فاتن وهي المفروض يكون عندها علم بموضوع جامعة نورة، خلي عندك تفاؤل ان شاء الله

شكرًا ، جزاكم الله خير
طيب سؤال تاني، اللي يسجل لبرنامج سحب الدم أو غرف التبرع، هل ممكن يختبر بعدها ويتصنف؟

أعتقد يتم التصنيف على فني سحب الدم وغير متأكد اذا كان يلزم اختبار، مدينة الملك فهد الطبية أعلنوا قبل أشهر عن برنامج دبلوم سحب الدبلوم عندهم وكان مفتوح البرنامج حتى لخريجين الثانوية! بمعنى أن الدورة حتى من دون شهادتك الجامعية بامكانك التصنيف لأنه دبلوم بعد الثانوي لكن ممكن يفرق الراتب لخريجين الجامعة
على كل حال أشوف العمل في مختبر حتى كفني أفضل وبامكانك التطور فيه أكثر من سحب الدم

ايوه طبعًا أفضل، بس قابلت أحد الزميلات من نفس التخصص (بيوكمستري) وقالت لي حتى بعد التصنيف الأغلب إنهم يشغلوا خريجي البيوك في سحب الدم فقط!
ففكرت ربما أفضل الواحد ياخد كورس متخصص في الشي اللي ممكن نشتغله

شكرًا لك.

انا بقولكم تجربتي
العام الماضي مستشفى الحرس الوطني اعلن عن نفس الدوره
وكان فيه وعود كثير بالاعلان منها انه فيه وظيفه بعد انتهاء فترة التدريب

رحت قدمت قالولي تعالي اختبار الانجليزي
رحت امتحنت والحمدلله ماشاء الله اخذت 90 او 91 مش متاكده ومعدلي التراكمي 4.22
انجليزتي عموما الحمدلله طيبه

بعد الاختبار نادوني قالو تعالي فيه مقابله شخصيه
رحت عالموعد وانتظرت نادو اسمي
دخلت لقيت رجل من المختبر اعتقد انه مدير او شيء لا اذكر
وسيده لا اذكر ايش منصبها بس طبعا له علاقه بالمختبرات

جلسوني وقبل اي كلمه انطقها قالولي مين السبونسر حقك؟
(سبونسر ويقصدو فيها يعني مين حيدفع تكاليف التدريب حقتك شركه مستشفى جامعه الخ)
قلت انتم بالاعلان حطيتو عشر شروط ويمكن اكثر ما ذكرتو انه التدريب يحتاج سبونسر او انه الطالب يدفع رسوم ماليه!
ناظرو في بعض وقالو بصراحه ما ذكرناها بالاعلاان بس التدريب مش مجاني لازم يكون فيه سبونسر مغطيكي او انتي تدفعي من جيبك الخاص!
قلت طيب ما عندي سبونسر واذا بدفع من جيبي الخاص كم القسط؟ قالو 25 الف ريال
وبعدين الرجل قال وكمان مافي وظيفه بعد التدريب لكن ممكن تقدمي بمستشفيات ثانيه!

يعني الان فيه كذبتين
الكذبه الاولى انه ماذكرو بالاعلاان انه لازم يكون فيه سبونسر واللي ما عنده يدفع قسط 25 الف
الكذبه الثانيه انه اصلا مافي وظايف هو برنامج تدريبي مدفوع نهايته انه اخذتي دوره وخبره في مستشفى كبير لمدة عام ثمن تمسكي الباب..

طبعا انا من يوم شفت الملاوعه والكذبات تتكشفلي من اول ما قعدت قبل حتى ما نعمل المقابله الشخصيه وانا نفسي صدت عنهم!!

بعدها انا سكت قالو يلا نعمل مقابله شخصيه وعلى فكره كل المحادثه اللي صارت فوق كانت باللغه الانجليزيه ولما بدانا المقابله الشخصيه كانت طبعا مستمره باللغه الانجليزيه سالوني عن وضعي ووضع زوجي واولادي واهلي وسكني ثم بدؤو يسالوني بالتخصص

خلصنا المقابله بالاخير قالو احنا حابين تنضمي لنا ولكن لازم دفع القسط من جيبك الخاص او تلقي سبونسر يغطيك


خرجت من المكتب طالعت في البنات اللي برى مساكين قاطعين تذاكر وجايين من المدينه والخبر ومن الجنوب مساكين يحسبو التدريب مجاني زي ما كان مفهوم من الاعلان ..


طلعت وانا معصبه ضيعولي وقتي مرتين مره بروحتي لاختبار اللغه الانجليزيه ومره بالمقابله الشخصيه وانقهرت انه مافي مصداقيه بالتعامل وماعرف ايش رح يخسرو لو كتبو بالاعلاان انه مافي وظيفه بعد التدريب وانه لازم رسوم على التدريب عشان اللي مقدم يكون عارف مقدم على ايش!!

حبيت اقولكم تحربتي


ولكن دورات سحب الدم منتهيه بالتوظيف لانه يبغو يتخلصو من الجنسيه الفلبينيه ويسعودو هذا النوع من الوظايف..
لي صديقه انضمت الى دورة سحب الدم عام 2007 وفعلا وظفوها مباشره بعد التدريب ولكن قالو لها دخول على المختبر مااافي فقط سحب دم في العيادات الخارجيه او داخل غرف المرضى او العمل في منطقة استقبال العينات والان واحنا 2014 مازالت في نفس الاماكن اللي حددوها من يوم ما قدمت بس عالاقل كانو صريحين معاها من البدايه انه لا تعشم تدخل جوى تشتغل في المختبر لانه الاولويه حسب ما قالو لها لخريجين التقنيه الطبيه والعلوم الطبيه لانهم يرو انهم كفؤ اكثر من طالبات البايوكمستري والمايكرو بيولوجي ....


الله يوفق الجميع ويختارلنا اللي فيه صالح وخير دائما..

والدة عبودي، البرنامج في العام الماضي قبلوا عدد من غير الموظفين وبالعكس كانت تمشي لهم مكافأة بعد والبعض وقعوا معهم بعد نهاية الدورة لكن كلامهم لك عن دفعك لمصاريف الدورة غريب الصراحة ومتأكد أن هالشي ما تطرقوا له السنة هذي ابدا والدورة على برنامج السعودة عندهم
اتفق معك تماما بأن طريقة اعلانهم فيها الكثير من الغموض وعدم الصراحة، على سبيل المثال اسم الدورة دورة أخصائي مختبرات لكن مالهم أي علاقة بالتصنيف وهالشي بينك وبين الهيئة الي راح تعتبرها لك تدريب سنة وتصنف خريجين الكيمياء الحيوية والأحياء الدقيقة على فني
عموما هم عندهم احتياج كبير لموظفين في المختبر خصوصا مع قرب افتتاح المختبر الجديد والي يحتاج الى عدد كبير من الموظفين، حتى في المقابلة طلب مني الالتزام بالعمل معهم لسنوات وهذا الي تعهدت عليه وأعتقد جديتك يساعدك كثيرا على القبول
الي سبق وتدرب من قبل وأخذ التصنيف البرنامج ما يصلح لك لكن الي محتاج يتعلم وياخذ خبرة قبل العمل أعتقد بأن البرنامج مناسب جدا
الله يكتب الي فيه الخير للجميع

السلام عليكم ...

الف مبروك لكل المقبولين .. وربي يعوض كل اللي ما انقبلو بوظايف احسن

دخلت علشان ارد على كلام والدة عبودي او أي احد يشكك بالبرنامج

مو صحيح ابدا ان البرنامج بفلوس او يحتاج سبونسر هم بس يقولو كدا علشان يشوفو جدية الشخص
او لا .. وهالكلام انقال لي انا كمان

وبخصوص التوظيف ان شاء الله في وظايف لكل اللي ملتزمين وجديين بالشغل والتدريب
الأسبوع الجاي بنكمل سنة ان شاء الله ومن الان بدأنا باجراءات التوظيف
وكلنا اللي سبق وانقبلنا بالبرنامج راح نتوظف ماعاد وحده بسبب عدم التزامها وغيابها الكثير

بخصوص المكافأة فهي مجزية والحمدلله .. لكن حسب ماعرفت راح تختلف لاختلاف بالبرنامج عن السنتين السابقة ..لكن العلم عند الله (( أتمنى عدم الاحراج والاستفسار عن المكافاة كم ! )

البرنامج قوي جدا جدا استفدت منه كثير سواء الجزء النظري (المحاضرات ) او الجزء العملي
صحيح ضغط لكن بتستفيدو منه ..

انصحكم الاجتهاد واغتنام الفرص والانضباط ...

أي استفسار بحاول ارد عليه ان شاء الله هنا وليس على الخاص ..

ورب يوفقكم جميعا