اسعد الله اوقاتكم بالمسرات




باختصار المشروع


( مشروع اغنام ) تخصص الاغنام الحرية

وحديث الرسول صلى الله عليه وسلم قال ( اتخذوا الغنم، فإنها بركة‏ )

والغنم من دواب الجنه والاحاديث عنها كثيره

وعندي درايه تامه وخبره واعرف عنه كل شي


وابحث عن المشاركة براس المال وانا بالادارة





طبعا الغنم الحريه هي افضل من الغنم النجد او النعيم او المعزا

لانها اقتصاديه ما تاكل كثير وسريعة الانتاج وقليلة الامراض ومطلوبه في السوق

اربع اسباب ذات اهميه

طبعا الحريات تلد كل خمس شهور او ست شهور واذا الطلي ممتاز بعضهن يلد على اثنين

نجي نحسبها بالارقام

لو شرينا 150 راس حريات على الاقل بيكون فيها 50 راس متابيع يعني معهن عيالهن


الى هنا تمام وواضح

علشان ما نروح ندفع بعد فلوس

نبيع عيالهن
اذا قلنا بنبيع بسرعه ومستعجلين ب 800 ريال على اقل تقدير 800 * 50 = 40 الف ريال هذا بعد ما نشتري الغنم مباشره
والان سعرها في السوق تقريبا 800 ريال للراس الواحد اذا عمره شهرين

ال 40 الف نحطها على جنب للمصاريف . نرجع لها شوي

هنا اصبحن الغنم حول يعني بدون عيال نحطهن لحال واي وحده دافع يعني حامل نحطهن لحال الى ان تلد
وطبعا فيهن اللي يولدن واللي يولدن نحطها لحال لمدة اسبوعين ثم نخلي الطلي يلقحها وخمس شهور وتولد ثاني وهاكذا لجميع الغنم


هذا كله بيكون بعد الشراء مباشره من اول اسبوع

الان عندنا بعض الغنم بدون عيال والخرى دفيع يعني بيولدن
وخلال ال 6 شهور المقبله راح يولدن كلهن ان شاء الله
واللي ما تولد نبيعها ونشتري غيرها بنفس السعر

نجي نحسب التكلفه الشهريه

عندا الان 150 راس
التكلفة اليوميه

2 كيس شعير في اليوم . الكيس الواحد تقريبا 30 ريال * ٢ = 60 ريال . في 30 يوم = 1800 خلنا نقول 2000 ريال

البرسيم يكفي 5 بلكات يوميا . البلكة 15 ريال 15* 5 = 75 ريال في اليوم * 30 يوم = 2250 خلنا نقول 2500

طيب 2000 شعير و 2500 برسيم 4500 ريال شهريا

والعامل 1000 ريال تطلع كلها 5500 ريال

الى هنا حلو

نرجع الى ال 40 الف اللي على جنب

نقسم ال 40 الف على 5500 ست شهور المقبلة = 33 الف وطلع زياده 7 الاف ريال



اصبح عندنا مكسب 7000 ريال


ومكسب

اصبح عدد الغنم 300 راس في ست شهور فقط

لو قلنا مثلن بنبيعها راح تجيب لنا على الاقل 400 الف

واذا خليناها افضل وافضل وافضل

هذا كله في ست شهووووووووووور بس



هنا يكفي حديث الرسول صلى الله عليه وسلم



انا اعرف ناس ركبو جيوب اخر موديل منها في وقت وجيز



واخيرا من يريد المشاركة اهلا وسهلا
انا لو عندي فلوس كان اشتغلت فيها من زمان

وارجع واقول من وده نتشارك حياه الله
عليه راس المال والباقي عليه

والله يكتب لنا الخير



واتمنى اني وفقت في الشرح


والسلام عليكم

اخوي الله يوفقك وشرحك البسيط بحد ذاته دراسة جدوى واستفدنا منك
لكن فيه عدة اسأله في ذهني
$في اي منطقة سيكون المشروع
$كم رأس المال المطلوب
$طريقة توزيع الارباح او الخسارة لا سمح الله
$ ذكرت الايجابيات واستشهدت بحديث الرسول علية افضل الصلاة والسلام عن بركة الغنم
فارجوا ذكر السلبيات للاغنام من حيث التجارة فيها
تحياتي

يسعد مساااك اخوي كم المبلغ الطلوب للمشاركه في المشروع بحدود كم وكيف نظمن حقنا ياغالي

هلا بك يا مخاوي

المشروع لو يكون في حوش استراحه عادي اهم شي تكون الغنم في ضلال في الصيف وفي دفا في الشتا


وبالنسبة لراس المال على الاقل ١٠٠ الف وكل ما صار اكثر صار افضل


وبالنسبة للارباح والخساره لا سمح الله تكون بالاتفاق بيننا


اما سلبيات الغنم من جهة الامراض فهذي قليلة وللاحتياط ما يتم الشراء الا بعد التاكد من سلامتها وهذا بسيط لدى اهل الخبره
وبعد الشراء نعطيها التحصينات والتطعيمات للاحتياط


اهم شي للغنم المكان النظيف والهواء النظيف والعنايه بها وتعال شوف الانتاج

اسأل الله لكم التوفيق والتيسير والرزق الحلال

.:: الغنــم غنيمــه ::.

الله يعطيك العافية
انا اقصد باي مدينة سيقام المشروع حيث ان الرياض او القصيم ما عندي مانع يكون على اساسها يتم المشروع
وبعدين اهل نجد يفضلون او الغالب عندهم النعيمي والنجدي

انا من اهل نجد
صح هم كانو يفضلون النجديه لاكن الان الحريه هي اللي ماشي سوقها


والمشروع يفضل في منطقة الرياض لاني من اهلها

مشروع جبار بس يالغلا بالنسبه للمصاريف حسابك لها خطأ
الشعير مو كل يوم ينعطى اللبهايم الناس تعطيها يوم بعد يوم وبالنسبه لبرسيم ينعطى بس للبهايم اللي معاها طليان صغار عشان تدر اللبن
والقصب ينعطى لها كل يوم بفترة الصباح والمساء