تجمع للأخصائيات الإجتماعيات ( خدمة إجتماعية .. علم إجتماع ) حييـآآآكم ..
 

الســلام عليكم ورحمة الله وبركااته


مســاء / صبـاحـ الخير لكم جميعـــاً .. وعسى أموركم بخير وسلامــة

بصــرآحة وانا اقلب فالمنتدى مالقيت موضوع يخص الأخصائيات الاجتماعيآت سواء

تخصص ( خدمة إجتماعية .. علم إجتماع ) :(

قلت ليه يعني حتى بالمنتدى مالنا رب واحد يحكي عننا :cry::cry::cry::cry:

فحبيت أفتح هالموضوع يكون خاص فينا نجتمع فيه ونتناقش

ناخذ خبرات بعض .. وين أشتغلوا اللي سبق وعملوا قبل كذا

ايش الصعوبات اللي بتواجهنا ؟؟

نتكلم فكل شيء يخصنا وندل بعض ع اماكن دورات ممكن تفيدنا او مراكز تقبل توظفنا

يعني موضوع مفتووح للفضفضه وإفادة البعض


والله جد مسآآكين احنـآ ضايعين بين هالتخصصات لاتعليمي معترف فينا

ولا مراكز إجتماعية كثير مفتوحــة تقبلنا :court::court:



يلا أنتظر أي وحده تنتمي لهالتخصص تنورنا بوجودهــا .. :h

مشكوره على البادره الجميله ياعسل والله يقدر نفيد ونستفيد بالتجمع ان شاء الله
سجلي اول اخصائيه اجتماعيه (خدمه اجتماعيه طبعا)
معطله عن العمل الى هذه الساعه والله كريم ^_^

سبحان الله كانت نفس فكرتي

بس سبقتيني بالتنفيذ ومشكوره ياقمر يارب يوفقنا ونفيد ونستفيد

ننتظر البقيه

اهلا اهلا أنفاس الأمل والله يجعل لك من نكك نصيب

حيآآآك ومبروووك عليك المركز الاول ياعسل :d


انا مثلك خدمة إجتماعية ..

هههههههههههه ياحبي لك .. ماعليك النيه موجوده وانا وانتي واحد ياعسل ..

وترا الموضوع للكل يعني لاتخلونه رسمي ماتتكلمون الا وانا فيه ,

التخصص علم اجتماع
مشكوز علي الموضوع

اهلا هلا ضموني للعدد اللي بيهب بعد ايام <<< واثقه من كثر خريجات هالتخصص المظلوم
الله يرزقنا من عالي سماء يااااارب ياااارب احد يعطينا وجه بس ويوجد لنا مسمى ووجود
بجد احنا مهمشين بالحيل بالمجتمع وينك ياداوود الشريان الحقنا قبل نشيب ونكهل ونهرم ونشيخ

الله يسعدك ع هالموضوع ويااارب فاتحة خير من بعده

يامعشر الاخصائيات سين سؤال
هل فيه احد خدمه اجتماعيه او علم اجتماع طلع اسمه بدفعة امس تعين مجال صحي؟

انا معكم تخصص علم اجتماع اوماجتزت قياس يعني مافيه امل اترشح :(

تخصص علم اجتماع خريج عام 1431هـ

هل من احد طلع اسمه بالدفعه الاولى

مرحبا بنات قسمي وأشكر صاحبة الموضوع على الفكره الأكثر من رائعه ,بصراحه انا أشوف تجمعات كثيره لكل التخصصات ماعدا خريجات الخدمة مالهم حس فحلو انه عملتي هذا التجمع لعلنا نفيد ونستفيد,خلونا نفضفض هنا ونلقى باذن الله حل لمشكلتنا , بالنسبه لي متخرجه من 6 سنوات ولاحصلت مكان الا وقدمت فيه بس للأسف التخصص غير مقبول ولامرغوب لكن أملنا بالله كبير وانا حابه ان داوود الشريان يتكلم عن تخصصنا لانه غير مدرج بالوظائف التعليمية وهذا ظلم لنا صحيح ان التوظيف الحين صعب لجميع التخصصات لكن انا ابغى بس يدرج التخصص ويكون مطلوب وله مسمى وظيفي كحال غيرنا بس الله كريم

طبعا انا خريجة خدمة اجتماعية تقريبا نقاطي 76 تقديمنا فقط بيكون على الوظائف الاداريه فحابه ان البنات يخبرونا عن نقاطهم ومتى تخرجوا ونشوف وضعنا والله يفرح قلوبنا بالوظيفه في القريب العاجل .. اللهم آآمين

مرحبا

انا خدمه اجتماعيه لي 5 سنوات متخرجه كل سنه اقدم ومايجيني اي وظيفه كلمتهم قالو نقاطي 71 انتظري لان ترتيبي وصل 2000 يعني بصير جده وانا ماتعينت مانقول غير الله يعين ويساعد

ام الغالي ممكن تزيدي وتغيري بالرغبات المكانيه كل ماكانت رغباتك كثيره بيكون أاسرع بالتوظيف بس طبعا لازم تختاري اماكن ظروفك تساعدك تروحين لها ...
انا لما اتصلت على الديوان اسالهم عن ترتيبي قالت انتي موداخله في المفاضله الاداريه الي كانت بشهر 10 بس الله يعوضني بالمفاضله الجايه وياليت الي عنده خبر متى تكون المفاضله الجديده يخبرنا عشان التحديث
ام الغالي الله يفرجها علينا وعلى كل العاطلات . امين يارب

هلا فيك .. والعفو حبيبتي

ههههههههههههه اجل احساسك بمحله ,,
بجد مهمشين للحين مو عارفين وين موقعنا من الاعراب الله يعدل الامور

وامين يارب يجي الخير قريب

هلا فيك ..

والله مدري عن هالتعيين اصلا فيه شغلات كثيرة احسها بتحصل من وراي

مع اني خريجة قديمة :d

افاا ما اجتزتي .. طيب مافيه مجال للاعاده

ان شاء الله يكون عن غيري جواب ..

هلا فيك قلبي ..

والله جد انا كنت اقلب فالمنتدى لعل وعسى الاقي احد مثل تخصصي لهم تجمع وشفت ابد ماافيه اي اثر:c

قلت والله مو سالفه ليه وضعنا كذا خلينا نعمل لنا موضوع ونتجمع بدال التشتيت حالنا حال البقية :d

والله حالنا محيوس ومحد معطينا وجه ..

لكن بسال الحين تقولوا وظائفنا ع الاداري والعام يقولون انه راح نكون مثل المعلمات فالرواتب


عندي كم سؤال بخليها فرد خاص فيني وبخصوص تساؤلك اي وحده تشوف كلامك باذن الله يردون

حبوبة كلمتي مين بالضبط .. والترتيب الحين وين واصل طيب

جد كيف اعرف كم باقي ع الوصول لرقمي ..

انا تخصص علم اجتماع
متخرجه من عشر سنوات
لم اتوظف قط
الله المعيين

مرحبا فيكم جميعا ..


انبسطت والله لمى شفت بنات تخصصي حسيت معي جماعه وسند مو لحالي

<< والله احساس جميل حتى لو كنا عاطلات حلو لقيتكم



المهم بنات انا متخرجة يمكن من 8 سنين << هههههههههههه امكم صرت

نقاطي وحده هنا الله يجزاها خير حسبتها لي تقول 79 وشوي ناسية عاد كم


ابي اعرف الحين النقاط وين واصله وكيف اعرف ترتيبي وين


وبخصوص جدارة انا حاطة الجميع لاحددت لا تعليمي ولا غيره مع اني مابي اكون مرشده بمدرسة وحدي


وانتوا يابنات الخدمة اختبار قياس صح مالنا فيه شيء لاني قلبته يمين يسار مالقيت تخصصنا

فبسالكم شلون وضعنا بيكون مع هالاختبار اللي مو مدرجين فيه ..


بعد فيه سؤال الحين احنا الاخصائيات مسمى فالمتعليم اداري وراتب بكذا بيكون مثل الاداريات


بس الغريب اذكر العام بما اني كنت اعمل بمدرسه قالت لي مشرفتي ان الاخصائيات بينظمون للتعليمي

وراتب المرشده بيكون مثل المعلمة مو مثل الادارية ..


والدليل ع كلامي لمى جابوا لنا اخر السنة ورقة التوقيع حقت العقود والزيادات حقت المعلمات

حطوا اسامي المعلمات كلهم واسمي انا فقط من الطاقم الاداري بالمدرسه كله

يقولوا الحين راتب المرشده مثل المعلمة حتى لو كان مسماها اداري .. عندكم علم بهالشيء او لا ؟؟




وبقية الكلام لي عوده ..

اهلين حبوبة ..

غريب طيب ما انقبلتي ع انك مدرسة لعلم الاجتماع

احس علم الاجتماع لهم سنع شوي مو مثل الخدمة

طيب كم واصله نقاطك اختي

هلا بيك ..اختي،

نقاطي 82
انا يمكن ماتعينت،لاني سابقا ماحطيت الا،منطقه
وحده برغبات المكانيه التعليمي،وغير التعليمي
عشان الظروف،

بس توني من اسبوعين حدثت،بياناتي،وزدت المناطق برغبات المكانيه

بس وحدة من دفعتي انقبلت ببداية السنه برياض،مو نفس منطقتنا احيانا،مايصير فيه احتياج الا وحدة او ثنتين والاغلب مافيه احتياج


مرة بعد تخرجي بسنه تقريبا انقبلت بالافلاج وتبعد عن منطقتي سبع ساعات تقزيبا
اة اكثر.
لكن مابشرت لان انقبلت ع بند الاجور والراتب الفين بس
وقالت لي الي بديوان ماراح ايرسمونه ولا بيزيدون الزاتب قطعت الامل ....


ماوقعت العقد ورجعت ...والي يومك ماانقبلت لا بمستشفى ولامدرسه ولا


يالا الحمدلله ع كل حال

الله الموفق .....

^^^

الله يرزقك يارب وتتعيني قريب ..

مين علم نفس ونقبلت في الاداري من اخر دفعه

الله يسمع منك،حبيبتي،....معك،ان شاء الله
ومع بقية البنات ....
يارب يفرج عن الجمييع رجال ونساء ... :)

حبيباتي احنا الامل احنا القوه خدمه اجتماعيه بنظري معناه اني اكون مصنع امل وتفائل متنقل واساعد اي انسان انه يكون متفائل نشيط متعلق بالامل وحب الحياه
وبحكم تعصبي التام للخدمه الاجتماعيه وحببببي العميق لها
اطلب منكم ياقومي اننا مانكون فاقدين للامل والي يدخل تجمعنا يشوفنا متحطمات نوعا ما
لا بالعكس احنا اساس كل تجمع بكل مكان واحنا الي نساعد الناس انها تعيش الحياه بفرح

ابتسمو يامعشر الاخصائين والاخصائيات كل المجتمع محتاج لنا ^_^

على فكره انا امارس حياتي كاخصائيه وحتى ولم اكن موظفه يعني احلى مافي تخصصنا انه علم حياه
<<<<<جابت سيرة تخصصها المحبوب كيف بتسكت

هههههه لاخلاص مابي اكثر كلام كمان
اسعدكم ربي وافرح قلوبكم واستجاب دعواتكم .........
يوم الجمعه ووقت الاستجابه فليعطني الكريم منكم دعوه غيبيه رائعه ولكم مثلها مقدما

منوررررررريين يابنات تخصصي انا خدمه اجتماعيه متخرجه من عام 1429 ولحد الان ماتوظفت
انوااااااااع الاحباط والملل لاوظيفة ولا عيال والله المستعان الله يرزقنا جميعا بالي يفرح قلوبنا

بناات هذا رقم الديوان كلموهم الصباح واطلبو تعرفون كم نقاطك وترتيبك.

٠١٤٠٥٧٧٧١
تحويله ١١٣ و ١١٤

انفاس الامل ..

ماشاء الله لك من اسمك نصيب .. والله اوقات الاخلاق تخرب خاصه

لو دخلتي مرحلة طفش او ضيقه واجتمعت مره وحده

ومثل ماقلتي وظيفتنا جميله ومهمه بكل مكان .. لكن الله يعين ويعطينا الصبر



..........................



ام الغالي مشكورة ع الرقم


..............................

















بنات تراني كتبت كذا سوؤال في احد ردودي واشوفك سحبتوا عليهم افا :m


جاوبوا ع اللي تعرفون منها لو سمحتوا :(

انا حاسه ان ربي بيفرجها علينا خلال سنتين قدام ان شاءالله ونقول باذن الله غدا دائما أجمل وبنتوظف جميعا يارب والتفاؤل شي طيب واهم شي الثقه بالله والتؤكل عليه ويارب تكون فيه مفاضله اداريه قريبه ويرشحون كم هائل من خريجات الخدمة الاجتماعيه وسبق اني سألت منتظر بتويتر قال ان تخصص الخدمة الاجتماعيه له نصيب الاأسد في وزارة الشئون الاجتماعية والأمل بالله كبير ... الله يرزقنا

اطفالي جنة حياتي انا متخرجه قبلك بسنه تخرجت 1428هـ والله يرزقك الوظيفه والعيال ويفرح قلبك يارب, انفاس الأمل في اي سنه متخرجه ؟؟؟

ماعندها سالفه ..الله يووفقك ياقلبي بالنسسبه للقياس انا ماختبرت ولافكرت اختبر لانهم قالوا تخصص الخدمة مو داخل بالوظائف التعليميه طيب شو الفائده اختبر ؟؟ بس ان شاءالله ندخل بالتعليمي

وبالنسبه لراتب انا اول مره اسمع هالكلام منك , لكن اذا تعينا ع وظيفه اداريه فاتوقع بيكون الراتب ع المرتبه السادسه اتوقع كذا نفس رواتب الاداريات لكن اذا وظيفتك بمسمى اخصائيه اجتماعيه فهنا بيكون الراتب اعلى وأفضل تعتبر وظيفه على الكادر الصحي والله اعلم

^^^

لا هالكلام حصل معي العام لمى كنت اعمل مرشده وانا اصلا اعتبر من الطاقم الاداري

لكن فورقة التوقيع ع العقد الجديد الخاص بزيادة الراتب للمعلممات اسمي انا الوجيدة من كل الاداريات

الموجود مع المعلمات ولو اني عملت معهم بكون استلم مثل راتب المعلمة

وما اتوقع هالشيء فالمدرسة الاهلية ومو صادر فيه قرار لنفس الوضع مع المرشدات بالمدارس

لان الاهليات اووم البخل فيهم مابيدفعون لك الا اكيد شيء نازل فيه قرار


ومستغربه انه عارفة

وانك تقولي لو توظفنا ع وظيفه حكومية راح تكون المرتبه السادسه


الا بسالك بعد الحين ما يكون مسمانا اخصائية اجتماعية الا فالكادر الصحي

طيب وفالشئون الاجتماعية ايش يكون بالله اداري يعني :mad::mad:

ومين منتظر هاللي سالتيه بتويتر ؟؟

ايوه ياقلبي منتظر هذا شخص له حساب بتويتر ويجيب اخبار الديوان واخباره صحيحه بس يتجاهل الرسائل ومايرد كثير عشان الضغط الي عليه .. فيه بنات طلعت اسمائهم وترشحو وطلبوا منهم شهادة التصنيف الصحيه تخصصاتهم خدمة ام علم اجتماع مو متاكده بالضبط شنو تخصصاتهم بس الاكيد انها من هالتخصصين فلما يطلبوا منك هالشهاده تكونين تابعه للكادر الصحي وهي افضل من حيث الرواتب على حسب كلام البنات ,, وان شاءالله يكون مسمانا بالوظيفه اخصائيه اجتماعيه والله ياقلبي اهم شي نتوظف وبس انا ماراح اشترط شي بس ابي وظيفه :m

وماشاءالله انتي خذيتي خبره على تخصصك بس ابي اعرف مدرسه اهليه ؟ وليش تركتيها ؟ وكيف كان الشغل ممتع او تعب وكرف !!

السلام عليكم ورحمة الله وبركاته

كيف حالكم صديقاتي ^_^

طبعا انا تخصصي خدمه اجتماعيه حالي حالكم ,, متخرجه من 3 سنوات

ماقدمت في جداره ابدااااا ,, ولا تسألوني ليش ^_^ ,, لاني مالقيت تخصصنا مدرج من ضمن التخصصات وغسلت يدي منهم

انا اختبرت قياس ,, ولا تسألوني ليش هههههههه ,, شفت العالم تختبر قلت وش زودهم عني

انا اشوف ان تخصص علم اجتماع افضل حال مننا , لان لهم تصنيف في التخصصات التعليميه ,, معلمة علم اجتماع للثانوي

اما احنا ,, لا لا معلمه ولا مرشده ولا هم يحزنون

والقهر قمة القهر لما تشوفين المرشدات الطلابيات في المدارس الحكوميه منها والاهليه ,, تخصصاتهم لا تمت للارشاد بصله ,, اللي تخصصها جغرافيا !!! واللي تخصصها أحياء !!!

عادي موظفينهم اخصائيات اجتماعيات

المفروض يكون فيه عددل ,, حتى احنا يوظفوناا معلمات جغرافيا واحياء .... الخ

وبالنسبه للي تبي تتوظف بمستشفى ,, لازم تاخذ بطاقة الهيئة السعوديه للتخصصات الصحيه

واذا كان مر على تخرجك اكثر من سنتين ( مثل حالتنا ) لازم تتدربين في مستشفى حكومي لمدة 3 شهور

برسوم 1000 ريال لكل شهر

وبالنسبة لسؤالك يا ماعندتس سالفه ^_^

خريجات الخدمه يصنفون مرشدات طلابيات ,, وبهالتصنيف يتقاضون راتب نفس راتب المعلمات تماما

اما لو كانوا ادرايات , ماعندي خلفيه صراحه

طيب بنات : مافكرتوا تكملون دراسات عليا ؟

بنات انا خدمة اجتماعية .. وتوي قبل شهر سجلت بجدارة مع اني خريجة من 4 سنوات اول ماتخرجت بس قدمت على الديوان مره وحده فقط ومن بعده حسيت ان الامل ضايع وفقدته ومع مرور الايام مريت بظروف نستني اني اقدم اصلا مدري متى يفتح ومدري متى يسكر ولا ادري وين الناس فيه مو اهمال للظروف اللي مريت فيها .. والحبيب الجديد اللي اسمه قياس مدري مقياس مدري تشويت يعني احلمو بالوظايف هذا استحقرته وكرهتهم مثل جدارة وقلت اكيد ملعنتهم مثلهم بالتمام رغم هالمره سالت الكل عن تخصصي متى راح يكون قالو انتو بعدين باقي لكم اسبوعين ويفتحون او اكثر ومرت الايام ونسيت عنه وشكله راح عني هالقياس ولا ادري وش معناه ولا وش سالفته صح بالنت المفروض ادخل اسوي سيرش بس التحطيم والايام اللي تمشي بسرعه بظروفها نسيت م ادخل ابحث واشوف واستكشف .. فمو فاهمه شي وبجد بديت اتوه مع ذا التخصص النايم .. اللي عندها اي خلفيه عن وضعي تعطيني امل سواء بالقياس او بالنقاط اللي تتكلمو عنها او اي شي لاني والله م افهم ابد بهالاشياء ..

هلا ايه قلبي عملت بمدرستين

الاولى هم تركوني لانهم طلعوا موظفين بدال وحده تقرب للمديرة احتاجت اجازة وجابوني بدالها

وهالمدرسه كانت بالنسبة لي مريحه لان المرحلة ابتدائي وكل صف عباره عن فصل واحد فقط واكثر فصل فيهم فيه 20 طالبه الاغلب مابين 15 _ 17 بنت يعني ماره قليل الطالبات

وغير كذا ابتدائي سهل العمل معهم


المدرسه الثانية مرحلتين متوسط وثانوي تركتهم لانه كرررف ما اقدر عليهم
كثير جدا وماجابوا احد يساعدني فتركتهم

هلا فيك اختي